Pages

Wednesday, December 31, 2014

2015
happy birthday to you

Friday, December 26, 2014

നുറുങ്ങുകൾ - 24

നുറുങ്ങുകൾ - 24
-------------------------

മതം

തമം
തിരിഞ്ഞു പോയതാവാം
മതം.
******

ചോദ്യങ്ങൾ
ഉപേക്ഷിച്ചവരുടെ
തൊഴുത്താണ്
 വിശ്വാസം
*******
വിവാഹം

ഒരു സ്വപ്നം
സത്യമായി തീരുമ്പോൾ
അതിലേറെ സത്യങ്ങൾ
 സ്വപ്നമായ് മാറും
******
പ്രവാസം 

ഒടുവിൽ
ഓരോ പ്രവാസിയും
നാടുകടത്തപെടുന്നത്
നാട്ടിലേക്കാണ്
*******

Thursday, December 4, 2014

വിളി

എന്തൊക്കെയുണ്ട് വിശേഷം ?-
പ്രിയ സുഹൃത്തേ
വല്ലപ്പോഴും വിളിക്കുമ്പോൾ
ചതഞ്ഞരഞ്ഞ ഈ ക്ലീഷേ
ഒഴിവാക്കുക
കണ്ണ് നഷ്ടപ്പെട്ടവനോട്
കാഴ്ച്ചകൾ വർണ്ണിക്കരുത് .
*
ചില വിളികൾ അങ്ങനെയാണ്
പ്രകൃതിയുടെ വിളി പോലെ
സമയമാകുമ്പോൾ സംഭവിച്ച് പോകും
ഒന്നിനുമല്ല
ഒന്നുമില്ല
ഇല്ലെങ്കിൽ
മുട്ടിയിട്ടും പോകാത്തത് പോലെ
*
പറയാനുള്ളത് കേൾക്കാറില്ല
കേൾക്കാനുള്ളത് പറയാറില്ല
എന്നിട്ടും
വിളിച്ചുകൊണ്ടിരിക്കുന്നു
കേട്ടുകൊണ്ടും
*
വിളികൾ നിലച്ചു
ചാറ്റും മടുത്തു
ഇനി
Whats up ?
 

Sunday, November 9, 2014

ഓർക്കാൻ ഒത്തിരി നോവും
നനയാൻ ഇത്തിരി കനവും ,
നിന്നെ എഴുതാൻ
എനിക്ക് വാക്കെന്തിന് ?
******

 

Friday, November 7, 2014

നുറുങ്ങുകൾ 23

തീരെ ചെറി യവരാണ്
അകത്തെ വലിയ  പീഠങ്ങളിൽ
വലിയവർ
പുറത്തെ വെയിലത്തും .
**********
വിജയികളായി എണ്ണുന്നവർ
കൂടുതൽ പണം നേടിയവരാണെങ്കിൽ
ലോകം തോറ്റവരുടെതാണ് .
**********

ലോകം വിജയിച്ചവരെ തെരയുന്നു
എന്തായിരുന്നു മത്സരം ?
ഇവർ ആരെയാണ് തോൽപ്പിച്ചത്?
***********

ചിലരെ  ഒരു  നോക്കിലറിയാം
ചിലരെ  ചില  വാക്കിലും
ചിലരെയറിയാനൊരു
ജീവിതം  പോര
**********
 

Thursday, October 9, 2014

തടവുകാർ

എന്റെ തൃഷ്ണകൾക്ക് മേൽ
അവർ പാപത്തിന്റെ മുദ്ര ചാർത്തി

എന്റെ ഇഛകളെ പ്രാക്താനമായൊരു
ഗോത്രബോധ യുക്തിയാൽ ആശ്ലിലമാക്കി

അരാജകന് നേരെ എയ്ത അമ്പ്‌
എൻറെ സ്വാതന്ത്ര്യത്തിന്റെ  നെഞ്ചിൽ തറഞ്ഞു

നിങ്ങളുടെ ശരികൾ വിശ്വാസത്തിന്റെ
പിന്തുടർച്ചകൾ  മാത്രം
എന്റേത് എന്റെ മാത്രം തോന്നലുകളും

എങ്കിലും

ഞാനും നിങ്ങളും 
നമ്മുടെ ശരിയുടെ തടവുകാർ
ലോകത്തിന്റെ  ന്യായാധിപരും

 

Wednesday, October 1, 2014

നിൽപ്പ്


നിലയില്ലാത്ത നിൽപ്പ്
നില തേടുന്ന നിൽപ്പ്
നിലനിൽപ്പിന്റെ നിൽപ്പ്
നിലപാടിന്റെ നിൽപ്പ്

നിൽക്കുന്നവന്റെ സഹനം
ഇരിക്കൻ തറ കിട്ടും  വരെ
കിടക്കാനിടം കിട്ടും വരെ

വയറുകത്തി നിൽക്കുമ്പോഴും
വീര്യം പൂത്തു നിൽക്കട്ടെ .

Friday, September 5, 2014

രാത്രി

അസ്ഥികൾ ചില്ലയായ് വേവുന്നു
 അപ്പം ചാരമായ് തിന്നുന്നു
തിരിച്ചെടുക്കും മുമ്പേ ഈപാനപാത്രം
 ഒരിക്കലെങ്കിലും നിറഞ്ഞിരുന്നെങ്കിൽ

 ഒലിവ് തോട്ടത്തിലെ ഇരുളിൽ 
രാവിൽ ഞാൻ വിലങ്ങണിയും
 വെളിച്ചം വെള്ള കീറും മുമ്പേ
 ഒരു വാക്കെങ്കിലും 
നീതി തേടുമോ 

ചുംബനത്താൽ 
ഒറ്റുകൊടുക്കപ്പെട്ടവനും
 ഒറ്റപ്പെടുകയും ചെയ്തവൻ 
ഞാൻ മാത്രമായതെന്തേ 

നീ കാരണം തേടി ഉഴറുമ്പോൾ
 ഞാൻ മരണം രുചിക്കും
 ഓർമ്മയുടെ മുള്ളുകൾ
 തീ പിടിച്ച പ്രജ്ഞയിൽ രക്തം നുണയും .

 കഷ്ടരാത്രിയിൽ ഞാൻ 
ഇരുളിന്റെ പൊരുളറിയുന്നു


Friday, August 22, 2014

നാറ്റം

 

കുട്ടപ്പനും അലവികുട്ടിയും 
ഒന്നിച്ചാണ്‌ ബാറിൽ പോക്ക് 
കുട്ടപ്പൻ അലവിയുടെ 
തലയിൽ വാള് വെക്കുന്നതും 
അലവി കുട്ടപ്പനിട്ടൊന്നു
 പൊട്ടിക്കുന്നതും നിത്യസത്യം 
ഇതിൽ വാർത്തയൊന്നുമില്ല  
ചുമ്മാ പറഞ്ഞതാ സാറേ .

തോരാ മഴയിൽ പനി പടർന്നപ്പൊ 
മറിയത്തിന്റെ ജ്വരം  മൂർച്ചിച്ച കൊച്ചിനെ 
നട്ടപ്പാതിരാക്ക്‌ തോളിലെടുത്തിട്ട് 
ആസ്പത്രിയിലേക്കോടിയത് ജാനകി 
നുള്ളിപ്പെറുക്കിയ കാശുമായ് 
പിന്നാലെ പാഞ്ഞത് ആയിശു 
ഇതിലും വാർത്തയില്ല 
വെറുതെയാ  സാറേ 

മലവെള്ളം പൊങ്ങിയപ്പൊ 
സ്കൂൾ വരാന്തയിലെ പുതപ്പിനുള്ളിൽ 
കെട്ടിപ്പിടിച്ച് വിറച്ചത് അവരുടെ  മക്കള് 
നമ്മളിതൊക്കെ തരംതിരിച്ച് എണ്ണുന്നത് 
അവരറിയുന്നില്ല സാറേ 

അച്ഛനും സ്വാമിയും ഇമാമും 
ഒരേ വേദിയിൽ കൈകൊടുക്കുന്നത് കാട്ടി 
രോമാഞ്ചം കൊള്ളുന്നു മാദ്ധ്യമങ്ങള് 
ക്യാമറക്കണ്ണിലും ആനന്ദബാഷ്പ്പം 

ഇതിന്റെ  പിന്നിലൊരു നാറ്റമില്ലേ സാറേ . 
 

Friday, August 15, 2014

നുറുങ്ങുകൾ 22

മതങ്ങളെല്ലാം പാടുന്നത്
പാവനമാം ദിവ്യസ്നേഹം
എന്നിട്ടും അതിന്റെ ചിന്ഹങ്ങളെന്തേ
ശൂലവും വാളും കുരിശുമായി .
********
പ്രണയിക്കാൻ മതം വേണ്ട
കലഹിക്കാൻ ഏറേ നന്ന്
സമാധാനത്തിനും മതം വേണ്ട
തീവ്രവാദത്തിനു കൂടിയേ തീരു


Tuesday, August 5, 2014

നുറുങ്ങുകൾ 21


വസ്ത്രം ഉണ്ടാക്കിയത് മനുഷ്യൻ
ഉടുക്കാൻ പഠിപ്പിക്കുന്നത്‌ ദൈവം

വാക്കുകൾ മനുഷ്യന്റെ സൃഷ്ടി
ഉദ്ബോധനം കര്ത്താവിന്റെ വക
***********

ഗുരുത്വമില്ലെങ്കിൽ
വഴിതെറ്റിപ്പോവും
ഗുരുത്വം കൊണ്ടാണ് ഭൂമി
വഴിപിഴക്കാതിരുന്നത് ,ചന്ദ്രനും
 **********
പ്രണയത്തിൽ നിന്ന്
പരിണയത്തിലേക്കുള്ള
പ്രയാണമാണോ
പരിണാമം



 

Friday, July 25, 2014

അകത്തിരിക്കുമ്പോൾ
മഴയെത്ര ഹൃദ്യം
പുറത്തിറങ്ങിയാൽ
തോരാത്ത ശല്ല്യം .

Saturday, June 28, 2014

*

നിൻ മിഴിനീർ മഴയിൽ
മുളപൊട്ടിയാർക്കുന്നു
മനസ്സിലെന്നോ മറന്നിട്ട വിത്തുകൾ .
******

വാക്കുകൾകൊണ്ട്
തുറക്കാനാവാതെ പോയത്
ഒരു നോക്കിനാൽ
താനേ തുറന്ന് പോയി .
******

അകത്തുള്ളതെല്ലാം
പകർന്നു തീർന്നാലും
അറിയാതെയൊരൽപ്പം
അടിയിലൂറും .

ജീവിതം മുഴുവൻ
പറഞ്ഞ് തീർത്താലും
പിന്നെയും വാക്കുകൾ
ബാക്കിയാവും


 

Sunday, June 15, 2014

വിചാരണ

എപ്പോഴും ശരിയായിരിക്കുക എന്നത്
ഏകാന്തമായ തടവറയാണ്
ശരികൾക്ക് നിങ്ങളെ പിന്തുടരാനാവില്ല
തെറ്റുകൾ വഴിയിൽ  ഉപേക്ഷിക്കുകയുമില്ല

തെറ്റായി പറയുന്നതെല്ലാം
ശരിയാവുമ്പോൾ
തെറ്റുന്നതാര്ക്കാണ് ?
എന്റെ ശരികളും
നിന്റെ ശരികളും
നമ്മുടെ മാത്രം ശരിയാവുന്നതെന്തേ ?

ശരിയും തെറ്റും വേഷം മാറുമ്പോൾ
നഗ്ന്നമാവുന്നത് സത്യം മാത്രം
ഇഷ്ടമുള്ള സത്യവും
ഇഷ്ടമില്ലാത്ത സത്യവും

എന്റെ തെറ്റുകൾ
എന്റേതു മാത്രമാവുമ്പോഴും
അത്  എന്റേതാണ്
അത് ശരിയുമാണ് .






Thursday, May 29, 2014

ഭ്രാന്ത്

ഓരോരുത്തർക്കും
ഓരോ ഭ്രാന്ത്
ഒരു ഭ്രാന്തുമില്ലാത്തവർക്കാവും
ഭ്രാന്ത് പിടിക്കുന്നത്‌ .
********

എന്റെ ഭ്രാന്താണ് നീ
നിന്റെ ഭ്രാന്ത് ഞാനും
നമ്മളെ ചൊല്ലിയാണ്
ലോകത്തിന് ഭ്രാന്ത്
********

മതമെന്ന ഭ്രാന്തുള്ളപ്പോൾ
മതഭ്രാന്തെന്തിനു വേറെ
********

 

Wednesday, May 21, 2014

നുറുങ്ങുകൾ -20

നിഷ്പക്ഷം എന്ന പക്ഷം
നിഷ്ക്രിയം എന്ന ക്രിയയാണ്
രണ്ടുവഞ്ചിയിലെ യാത്ര
കാറ്റ് വീശും വരെ പരമസുഖം
********

തിരിച്ച് നടക്കാനായാൽ
ചിലത് തിരിച്ചറിയാനാവും
ചില കാഴ്ചകൾ
മടക്കയാത്രയിലേ കാണാനാവു
*********







 


Sunday, May 11, 2014

byte into an apple*



വെർച്വൽ സ്വർഗ്ഗത്തിന്റെ
വാതിൽ തുറന്നപ്പോൾ
പൂമുഖപ്പടിയിൽ തന്നെ
ആരോ കടിച്ച ആപ്പിളിന്റെ ബാക്കി
സ്റ്റീവ് ജോബ്സാണോ  ?
ന്യൂട്ടനോ ?

മിസ്സിസ് ആദം,
ഇതും നീ തന്നെയാണോ ?

Monday, May 5, 2014

കാൽകീഴിൽ അമരുന്നത്

നീ താണ്ടിയ ദൂരമത്രയും
ഞാനും നടന്നു തീർത്തു
കാലിടറാതെ കാറ്റിലും മഴയിലും
 കാലിലൊരു മുള്ളുകൊള്ളാതെ
മുള്ളുകളെല്ലാം നെഞ്ചിലേറ്റി ഞാൻ

കാഴ്ചകൾ പൊള്ളിയ രാജവീഥികൾ
മൗനം പുതഞ്ഞ ഏകാന്തകാട്ടുപാതകൾ
നീ പൊരുതിയ വഴിയിലെല്ലാം
കാൽകീഴിൽ ഞാനുണ്ടായിരുന്നു

ലക്ഷ്യമെത്തുംവരെ ഞാനുമൊപ്പം
അകത്തളങ്ങളിൽ നീയെന്നെ കാലൊഴിഞ്ഞു
അടഞ്ഞ വാതിലുകൾക്ക് മുമ്പിൽ
ഓരംചേർന്നനാഥമായ്

കാണാതെ പോകുന്നു
മണ്ണിൽ തൊടാത്ത പാദങ്ങൾ
നിങ്ങൾക്കായ് തേഞ്ഞുതീർന്ന ജന്മങ്ങളെ .

 

Thursday, April 24, 2014

പാതി







അവൻ വിധേയനായിരുന്നു
അവൾ അന്വേഷിയും
ദൈവം മറച്ചുവെച്ച മനോഹര ഭൂമി
നമുക്കായ് കണ്ടെടുത്തവൾ .
ആദ്യ വിപ്ലവത്തിന്റെ നായിക
ചോദിക്കാൻ പഠിപ്പിച്ചവൾ  .


ഭൂമിയിൽ വിമോചനത്തിന്റെ
വെളിച്ചം പകര്ന്നവൾ
അമ്മയായും പ്രണയിനിയായും
ഭാര്യയായും മകളായും
ഇവിടെ വസന്തം നിറച്ചവൾ
അവളുടെ പാതിയാണവൻ

പ്രാർഥിച്ചു തളരുമ്പോൾ
ഒരു നിമിഷം അവളെയോർക്കുക
ഒരു കനി അവൾക്ക് നൽകുക
ഒരു ദംശനത്താൽ മധുരം നിറച്ച്
അവൾ നിനക്കത് തിരിച്ചു നൽകും -
പുതിയ ഭൂമികൾ വീണ്ടെടുക്കാൻ

നന്ദിയോടൊരു വാക്ക് സാത്താനും .

Sunday, April 13, 2014

?










 ചോദ്യങ്ങൾക്ക് പിന്നിൽ
ഒരു വളഞ്ഞ കൊളുത്തുണ്ട്,
ചില ഉത്തരങ്ങളിൽ കൊളുത്തി വലിക്കാൻ .

തെറ്റായ ചോദ്യങ്ങൾക്കാണ്
 നാം ശരിയായ ഉത്തരം തേടുന്നത്
ഉത്തരം കിട്ടാത്ത ചോദ്യങ്ങൾക്ക് മേൽ
ഉത്തരം പോലൊന്ന് കമഴ്ത്തിവെക്കുന്നു
പിന്നെയും ചോദ്യം മുളയ്ക്കുന്നു .

ഉത്തരമില്ലാത്ത ചോദ്യങ്ങളല്ല
ഉത്തരം അധികരിച്ച ചോദ്യമാണ് ചരിത്രം
ചിലപ്പോൾ ചോദ്യങ്ങൾ വേട്ടപട്ടികളാണ്
മരണം മാത്രം മറുപടിയാവും .

വഴിയിലുപേക്ഷിച്ച ചോദ്യങ്ങളെ
കാലം വീണ്ടും ചികഞ്ഞെടുക്കും
ഉത്തരം തേടാനല്ല
ഉത്തരമില്ലെന്നറിയാൻ

സ്വയം ചോദിക്കുമ്പോൾ മാത്രമറിയും
ചോദിക്കാതെ പോയ ചിലത്
പുകയുന്നുണ്ടുള്ളിലെന്ന്
പറയാതെ പോയ ഉത്തരങ്ങളും .

Friday, March 21, 2014

നുറുങ്ങുകൾ -19

വലുതാവുംതോറും
തീരെചെറുതാവുന്നവരാണ് നാം
****

കുട്ടികളോട് കൂടണം
ഉള്ളിലൊരു കുട്ടിയുണ്ടാവണം
കെട്ടിപ്പടുത്ത പുറന്തോട് പൊട്ടി
നഗ്നനായ് കണ്മിഴിക്കണം
****

ഛ)യാമുഖിയിൽ
കാണുന്നതെന്നെ മാത്രം
പാട്‌പെട്ടത്‌ മായ്ച്ചാലും
നിറയുന്നത്  ശുന്യത .
****
  

Friday, March 14, 2014

മ്യാവൂ

ഫ്ലാറ്റിന്റെ പോർച്ചിൽ നിന്ന്
ഫോണ്‍ ചെയ്യുകയായിരുന്നു
ഓരോവിളികളിലും
എന്നെ ബോധ്യപ്പെടുത്തികൊണ്ടിരുന്നു

പെട്ടന്നാണതെന്റെ
കാലിൽ തൊട്ടത്‌
ഞെട്ടി പുറകോട്ട് മാറി
വളരാൻ തുടങ്ങുന്ന പൂച്ചകുട്ടി
അതെന്റെ കണ്ണുകളിലേക്ക് നോക്കി
എന്താടോ .ഇതിന് മുമ്പ് പൂച്ചയെ കണ്ടിട്ടില്ലേ ?
ചമ്മൽ മാറ്റാൻ ഫോണിലൊളിച്ചു

എന്റെപാദങ്ങളിൽ മൃദുവായൊരു സ്പർശം
അതിന്റെ കുഞ്ഞുടൽ കാലിലുരസുന്നു
ഇത്രമേൽ ഹൃദ്യമായത് ഇതിനു മുന്പുണ്ടോ ?
(മറ്റൊരാൾ എന്നെ തൊട്ടിട്ട് എത്ര നാളായിരിക്കും ?)

അവളെന്റെ പാദങ്ങൾ തൊട്ടുരുമ്മി
കാലുകൾക്കിടയിൽ കയറിയിറങ്ങി
ഞാൻ കാലുകൾ കുറച്ചുകൂടെ  ചേർത്തുവെച്ചു

അവളെന്നോട് പറയുന്നുണ്ടായിരുന്നു
സ്നേഹിക്കുന്നവരെ മാത്രമല്ല
സ്നേഹിക്കാൻ മറന്നവരെയും
ഇടയ്ക്ക് ഓര്ക്കണം .


Sunday, March 2, 2014

നിഴൽ



മരുഭൂമിയുടെ അടരുകൾക്കടിയിൽ

മരിച്ചുപോയൊരു പുഴയുണ്ട്

മണൽകാറ്റിന്റെ നെറുകയിലൊരു

മഴമേഘത്തിന്റെ നിഴലുണ്ട്

വെയിൽ തിന്നുന്ന മരത്തിന്റെ

വേരുകൾ മരിച്ചവരെ തൊടുന്നുണ്ട് .



എകാന്തതക്കും

ഒറ്റപ്പെടലിനുമിടയിൽ
.
മരുസാഗര ദൂരം

പല്ലിൽ കുരുങ്ങിയ ഇരയുടെ പിടച്ചിൽ

 

Saturday, February 22, 2014

വ്യാകരണം

അർത്ഥങ്ങൾ അറിയും മുമ്പേ
വാക്കുകൾ തന്നെ ഇല്ലാതാവും
അറിയാനായ്  അലയുമ്പോൾ
അലയുന്നതിന്റെ അർത്ഥമറിയും
അർത്ഥം പലപ്പോഴും വ്യർത്ഥമെന്നറിയും
*
ദൈവത്തിന് നാനാർത്ഥങ്ങളില്ല
പര്യായങ്ങളേയുള്ളൂ .
പരമാർത്ഥം തെരയുമ്പോൾ
പുരുഷാർത്ഥമറിയും
അന്വേഷിയും ദൈവവും
ഒരേവാക്കിന്റെ അർത്ഥമാകും
*
അമ്മയുടെ വിപരീതം അച്ഛനെന്ന്
അന്നെത്ര പഠിച്ചിട്ടും അറിയാനായില്ല
വളർന്നച്ചനായപ്പോൾ
എല്ലാ വാക്കിനും വിപരീതമുണ്ടെന്നറിഞ്ഞു
അച്ഛനും അമ്മയ്ക്കും മക്കൾക്കും .

വിപരീതങ്ങളുടെ അർത്ഥമറിയാൻ
ജീവിതം പോരാതെയാവും .




Thursday, February 13, 2014

നുറുങ്ങുകൾ 18

 .പാടിപ്പുകഴ്ത്തിയ
സ്വാർത്ഥതയാണ് രണ്ടും ,
പ്രണയവും പ്രാർത്ഥനയും .
**
പ്രണയിക്കാനൊരാളും
പ്രാർഥിക്കാനൊരു ദൈവവും
വിശ്വാസമാണെല്ലാം
 **
കണ്ണിന് എല്ലാം കാണാം
കണ്ണിലെ കരട് കാണാൻ
മറ്റൊരു കണ്ണുവേണം
**.
ചോരയാണ് ചരിത്രം
ആയുധം വാക്കുകളും
അന്നും ഇന്നും .
**
ചിലർ ആടിത്തിമിർക്കുന്നു
ചിലർ ആടിത്തീർക്കുന്നു

 

Saturday, February 8, 2014

ഭൂമിക

ഭൂമിക
______
മരമായ്‌ വളരണം
വിണ്ണിലേക്ക് -
മണ്ണിലേക്കും .
*
ചില്ലയുണങ്ങിയ
ചില മരങ്ങളെങ്കിലും
വേരുകളിൽ പൂക്കുന്നുണ്ട് .
മറ്റാരുമറിയാതെ .
*
പൂവിൻറെ നെഞ്ചുകീറിയാണിപ്പോൾ
കാറ്റ് പൂമണം നുകരുന്നത്
കാറ്റിന്റെ വാളൊച്ച കേട്ടാണിപ്പോൾ
മൊട്ടുകൾ വിരിയുന്നത്
*
പൊഴിയുന്ന ഇലകൾ
മണ്ണായ് തീരുമ്പോൾ
വേരുകൾ തൊടുന്നുണ്ടാവും
*
മഴുവുമായ് നീയെത്തുമ്പോൾ
കിളികളെല്ലാം പറന്നുപോകും
കരയാനറിയാതെ പാവം
കണ്ണടച്ച് പിടിക്കുന്നുണ്ടാവും

Friday, January 24, 2014

ബോണ്‍സായ്

ഇത്തിരി ചട്ടിയിൽ
ഇത്തിരി മണ്ണിലൊടുങ്ങും ജന്മം
ആരോ അദൃശ്ശ്യമാം കമ്പിയിൽ
വളച്ചെടുത്തൊരാകാരം .
ഇടയ്ക്കിടെ പറിച്ചെടുത്ത-
രിഞ്ഞു മാറ്റുന്നു വേരുകൾ .

ഒരു കിളിക്കും ചേക്കേറാനവില്ല
ഒരു പുഴുവിനും തണലാവില്ല
ആർക്കുമൊരു കനിപോലും നൽകാനില്ല

വെയില് കൊള്ളേണ്ട
മഴനനയേണ്ട
ജനലിനിപ്പുറം ഇത്തിരി ലോകം

ആരും മഴുവുമായ് വരില്ല
സുഖം സ്വസ്ഥo ജീവിതം
നമ്മൾ ബോണ്‍സായികൾ .

 

Monday, January 20, 2014

നുറുങ്ങുകൾ -17


ഒറ്റവാക്കിൻറെ നിഘണ്ടുവാണ്
പുതിയ കാലം -'achieve'
*********

വെയില് കൊള്ളുന്ന മരങ്ങളേ
തണലേകാറുള്ളൂ
*********

ആഴങ്ങളിലാണെല്ലാം
ചെളിയും ചിപ്പിയും
*********

എൻറെ  ശരികൾ
നിൻറെയും ശരികളാവുമ്പോഴേ
ശരിക്കും ശരിയാവു .
********

 

Tuesday, January 14, 2014

ബുദ്ധം

ആലിൻചുവട്ടിലുപേക്ഷിച്ച
അജീർണ്ണം ബാധിച്ചവന്റെ ജഡം
മരുഭൂമിയിലെ ചിതയിലെരിഞ്ഞു
ബലിയൂട്ടുമ്പോൾ ആരോ ചിരിച്ചിരുന്നു
തീർച്ചയായും
അത് അവനല്ല .

ചിരി അവരെല്ലാം പകുത്തെടുക്കും
നാളെ അശനിപാതമാവും
ചിരികൊണ്ട് മരണം
എല്ലാം തുടച്ചെടുക്കുമ്പോൾ
ആരോ ഒരാളുടെ കണ്ണ് നിറയും
തീർച്ചയായും
അത് അവനായിരിക്കും

 

Friday, January 3, 2014

നുറുങ്ങുകൾ (16 )

കുരിശേറിയ യേശുവാണ് മലയാളി
ഇടതും വലതും കള്ളന്മാർ .
_________
അന്ന് പിലാത്തോസ് കൈ കഴുകിയതേയുള്ളു ,
ഇന്നാണെങ്കിൽ പത്രസമ്മേളനം നടത്തും .
_________
കർത്താവ് മൂന്നാം നാൾ വന്ന് തിരിച്ചുപോയി .
ഇടംവലം നിന്നവർ ഇനിയും പോയില്ല .
_______
വിശ്വാസം സത്യമാക്കുന്നവർ
സത്യം വിശ്വസിക്കാറില്ല .
__________