Pages

Monday, December 27, 2010

ഡിസംബര്‍

ഡിസംബര്‍
മഞ്ഞു പെയ്തുകൊണ്ടേയിരിക്കുന്നു
എന്റെ സിരകളിലും

ഇനിയും മരിക്കാത്ത സ്വപ്‌നങ്ങള്‍ ഹോമിച്ചു നിനക്ക് ചൂട് പകരാം
എന്റെ ഇരുള്‍ വഴിയില്‍ ഒരു തിരി പകരം വെക്കുക
നിനക്കേകിയ പ്രണയ സാഗരത്തില്‍ നിന്നൊരു തുള്ളി
എന്റെ നെഞ്ചിലെ അണയാക്കനലില്‍ അര്‍പ്പിക്കുക
ചോര ചാലിച്ച് ഞാന്‍ എഴുതിയ വരികളിലൊന്ന്
അന്ത്യോദകമായ്  മന്ത്രിക്കുക
നമ്മള്‍ നടന്നു തീര്‍ന്ന വഴിയില്‍ നിന്നൊരു പിടി മണ്ണ്
നിനക്ക് പിറക്കും മകന് ആദ്യാക്ഷരം കുറിക്കാന്‍ കരുതുക

എന്റെ രക്തം വീഞാകുമെങ്കില്‍ നിന്റെ ദാഹം തീര്‍ക്കുക
ശരീരം അപ്പമാക്കി വിശപ്പടക്കുക
ഹൃദയം മാത്രം ചവച്ചു തുപ്പരുത്
അതിന്റെ ആഴങ്ങളില്‍ നിന്റെ കണ്ണീരുണ്ട്

Friday, December 3, 2010

കുടുംബപുരാണം

വക്ക് പൊട്ടിയ വാക്കിന്റെ വക്കിലെ വറ്റിനായ്
നാവ് മുറിഞ്ഞവന്‍ എനിക്കച്ചന്‍
തിരിച്ചുവരാത്ത മകനെയോര്‍ത്ത് നിലക്കാത്ത നിലവിളിയാല്‍
മൂകയായവള്‍ എന്റെ അമ്മ
പിറക്കാതെ പോയ കുഞ്ഞിന്റെ നെഞ്ഞിടിപ്പിനാല്‍ ബാധിരയായ വള്‍ എന്‍ സഖി
കരുണ തേടി മുള്‍മരം പുല്‍കി
അന്ധയായവള്‍ എനിക്ക് മകള്‍
കൂട്ടം തെറ്റിയ ആടിനെ തേടി പുലി മടയില്‍
അലഞ്ഞവന്‍ എന്റെ സുഹൃത്ത്
ചോര കൊണ്ട് നേര് തിരയാന്‍
മാറ് പിളര്‍ന്നവന്‍ എനിക്ക് മകന്‍
തൊണ്ടിന്നുള്ളിലെ  ഇരുള്‍ പുതപ്പില്‍
 നിത്യം സ്വസ്ഥംഉറങ്ങു ന്നവന്‍ ഞാന്‍

Sunday, November 28, 2010

മൗനം

മൗനം
ഒറ്റപ്പെടുന്നവന്റെ പങ്ക് വെക്കാനാവാത്ത   വേദനയാണ്
മൗനം
കീഴടങ്ങിയവന്റെ അപഹരിക്കപെട്ട നാവാണ്
മൗനം
കൂട്ടം തെറ്റിയവന്റെ കേള്‍ക്കാനാവാത്ത ശബ്ദമാണ് 
മൗനം
വരികള്‍ക്കിടയിലെ നീറി പടരുന്ന അഗ്നിയാണ്
മൌനം
തിരസ്കൃതന്റെ നിലക്കാത്ത പ്രതിക്ഷേധമാണ്
മൗനം
പിറക്കാതെ മരിച്ച വാക്കുകളുടെ എരിഞ്ഞുതീരാത്ത ഹൃദയമാണ്
മൗനം
തിരിച്ചറിയാതെ പോയ സ്നേഹത്തിന്റെ ഉണങ്ങാത്ത മുറിവുകളാണ്
മൗനം
ഏകാന്തതയുടെ സം ഗീതമാണ്‌

Friday, November 19, 2010

കിളിപ്പാട്ട്

ഒന്നംകിളി തുഞ്ചത്ത്
രണ്ടാംകിളി മുട്ടത്ത്
പിന്നെ കിളിയായകിളിയെല്ലാം കോട്ടയത്ത്
ഇന്നിപ്പോള്‍ ചാനലില്‍ ചേക്കേറി
മലയാളത്തെ ലൈവ് ആയി കൊത്തിപ്പറിക്കുന്നു

ഒന്ന്


ഒന്നുമില്ലോന്നുമില്ലോന്നുമില്ല
ഒന്നോര്‍ത്താല്‍ ഒന്നിലുമോന്നുമില്ല
ഒന്നിച്ച്ഹിരുന്നു ഏറെ കിനാവുകണ്ട്‌
ഒന്നയിതീരുവാന്‍ കാത്തിരുന്നു
ഒന്നൊന്നായ് കാലം കഴിഞ്ഞുപോകെ
ഒന്നുമായില്ല
ഒന്നവാനുമായില്ല
ഇന്നെല്ലമെനിക്കൊന്നു തന്നെ

Friday, November 5, 2010

ശിഷ്ടം

കഷ്ടകാലം കടുത്തപ്പോള്‍

നഷ്ടങ്ങളുടെ കണക്കെടുത്ത്

എത്ര ക്കൂട്ടിക്കിഴിച്ചിട്ടും

ശിഷ്ടമായത് ജീവിതം

നഷ്ടമായതും ജീവിതം

Thursday, November 4, 2010

നമ്മള്‍

നീയൊരു കടലായ്
ഞാന്‍ ആകാശവും
കടലുമാകാശവും ചേരുന്നിടം
ഒരു മായക്കാഴ്ച മാത്രം