Pages

Tuesday, November 29, 2016

അസംബന്ധ കവിതകൾ -19


എന്നെ  ചുഴറ്റും
 ഭ്രാന്തിനു ബലിയായ്
എറിഞ്ഞുടച്ചു ഞാനെന്റെ  അഗ്നിബിംബം

ചിതറി തെറിച്ച സൂര്യനെ
വാരിയെടുത്തെന്റെ
വിരലുകൾ വെന്തുപോയ്


Friday, November 18, 2016

അസംബന്ധ കവിതകൾ : 18

വെയിൽ
ഇലകളോട് പറഞ്ഞത്
വേരുകൾ
മണ്ണിൽ കുറിച്ച് വെക്കുന്നു
*******

വേനൽ
പിഴുതെറിഞ്ഞ ഇലകൾ
വേരിലേക്കുള്ള
ദൂരം കുറക്കുന്നു

Thursday, November 10, 2016

ശംഖ്

ശംഖ്
_______

ജലം
 മാഞ്ഞുപോയൊരോര്മ്മ
കടൽ
ഏതോ പ്രാചീന കാലം
ഇന്നും
ശംഖിനുള്ളിൽ
ഒരു കടലിരമ്പുന്നുണ്ട് 

Thursday, October 13, 2016

അസംബന്ധ കവിതകൾ :17

ജാതി
ജന്മനാ ലഭിച്ചത്
ജീവിച്ചു  ശീലിച്ചത്
മരിച്ചാലും മായാത്തത്
**********

മതം
പണമുള്ളവന്റെ  പട്ടുകുപ്പായം
പാവങ്ങളുടെ ചർമ്മരോഗം
***********

ദൈവം
എല്ലാറ്റിനും മുകളിൽ
നമ്മളുറപ്പിച്ച
സി സി ടീ വി  ക്യാമറ






  

Saturday, October 1, 2016

കത്തിക്കാളിയ കാലം

ഫ്രഞ്ച് പ്ലേറ്ററിൽ  വാഴപ്പിണ്ടി തോരൻ
ക്രിസ്റ്റൽ ടംബ്ലറിൽ കട്ടൻ ചായ
ഇറ്റ്സ് യമ്മി
യാത്ര ചൊല്ലി ചങ്ങാതി പോകുമ്പോൾ
അന്നത്തെ അന്നം തീർന്നിരുന്നു

വയറ് കത്തിക്കാളുമ്പോൾ
നീറിപ്പടരുന്നത്
ഇല്ലായ്മയിൽ മൂർച്ഛിക്കും  അഭിമാനബോധം

നാളേക്ക് ഒരുമണി അറിയില്ലാതാവുമ്പോൾ
നോക്കാൻ  ഭയക്കുന്നത്
കുഞ്ഞുങ്ങളുടെ മുഖമാണ്

വിലയേറിയ സ്വപ്നം
ഒരു  നേരത്തെ ആഹാരമാകുന്ന
പീഢനത്തോളം വരില്ല
ബുദ്ധനും ക്രിസ്തുവും

ഒട്ടിയ വയറുമായ്
ചേർന്ന് കിടക്കുമ്പോൾ
 പ്രാണൻ പിടഞ്ഞു 
നീയേകിയ  ചുബനത്തിൽ
 ഇന്നും കിനിയുന്നു നനവ്














Sunday, September 25, 2016

നിറം മാറുന്ന വീടുകൾ



ഞാൻ  മാലതി അമ്മ
w/o ലേറ്റ് ശ്രീധര മേനോൻ

സിറ്റ് ഔട്ടിലിരുന്നായിരുന്നു പത്രവായന
ഇപ്പോൾ എന്റെ മുറിയിലിരുന്നായി

ഡൈനിങ് ഹാളിന്റെ മൂലയിലായിരുന്നു ടീവീ
ഇപ്പോൾ എനിക്ക് മാത്രമായി മുറിയിലൊന്ന്

വീട്ടിലെ  വലിയ മുറിയായിരുന്നു ഞങ്ങളുടേത്
എനിക്ക് മാത്രമായി വലിയ മുറി വേണ്ടല്ലോ

ഊണ് കഴിക്കുമ്പോളായിരുന്നു ചർച്ചകൾ
ഇപ്പോൾ ഊണും തനിച്ചായി
രഘുവിന്റെയും രമയുടെയും
കുട്ടികളായി ഒഴിവു ദിവസം കൂട്ട്

എല്ലാവരും ചേർന്ന് പുറത്തു പോകുമ്പോൾ
വീട് പൂട്ടിയിരുന്നു
ഇപ്പോൾ വീട് പൂട്ടുന്നത് സുരക്ഷിതമല്ല
വീടിനു കാവൽ ഞാനായി
എനിക്കും

വീടെത്ര  മാറിപ്പോയി


Friday, September 2, 2016

അസംബന്ധ കവിതകൾ :16

എല്ലാവരും നിങ്ങളെ ശരിവെക്കുന്നു എങ്കിൽ
നിങ്ങൾ ചെയ്യുന്നതിൽ എന്തോ പിശകുണ്ട് ,
******

മരിച്ചു കഴിഞ്ഞാൽ നിങ്ങളെ അവർ
ഒർക്കുമെന്ന് നിങ്ങൾ  കരുതുന്നു
അവരോ ,അന്ന്  രാത്രി തന്നെ
ഒരു വേട്ടയുടെ കഥ പറഞ്ഞു ചിരിക്കുന്നു
******

മരണ വീട്ടിൽ സ്വന്തം മൊബൈലിലെ
സംഗീതം കേട്ട് നിങ്ങൾ ചൂളുന്നു
സത്യത്തിൽ നിങ്ങൾ പാടുന്നില്ലെന്നേയുള്ളു
*******

Friday, August 19, 2016

അസംബന്ധ കവിതകൾ : 15

എന്റെ  ഇരുട്ടിന്
നീ ഏഴ് നിറങ്ങളും പകർന്നു
എന്നിട്ടും ഞാൻ  വരച്ച
മഴവില്ലെന്തേ   കറുത്തുപോയി
*******
എല്ലാം കൊഴിഞ്ഞു
പോകുന്നുണ്ട്
വാക്കുകളും
നിറങ്ങളുമൊഴികെ
*********
മടുപ്പ്
മോക്ഷമാണ്
നിശബ്ദമായ് ജീവിക്കാം
ചിരിച്ചു കൊണ്ട് മരിക്കാം
*********
മനുഷ്യ സ്നേഹം
എനിക്കേറെ ഇഷ്ടം
 ഇനിയും മനുഷ്യനെ
സ്നേഹിക്കാൻ പഠിച്ചില്ല

Wednesday, August 10, 2016

അസംബന്ധ കവിതകൾ 14

ഉണ്മ എന്തെന്ന്
അറിയാമെന്നിരിക്കെ
വിവരണങ്ങൾ
എത്ര വിരസമാണ്
*******

ഞാൻ വരഞ്ഞ
 കാട് മാത്രം നീ  കണ്ടു
അതിൽ മരങ്ങളും
മരങ്ങൾക്കിടയിൽ
കാറ്റുമുണ്ടായിരുന്നു
********

സന്തോഷങ്ങളിൽ
നിങ്ങൾ സ്വയം നഷ്ടപ്പെടുന്നു
ദുഃഖത്തിൽ
നിങ്ങളത് തിരിച്ചെടുക്കുന്നു





Monday, August 1, 2016

സിനിമ പരഡിസോ

ശ്രീകൃഷ്ണ ഇന്റർനെറ്റ്  കഫേയുടെ സ്ഥാനത്തായിരുന്നു
പുഷ്പ ടാക്കീസിന്റെ കറുത്ത കരയുള്ള വെള്ളിത്തിര
അവിടം മുതൽ ചോയ്സ് ഫാഷൻസ് വരെ
തറക്ലാസ്സ്
*
തറയാണ്   ആദ്യം നിറയുക
ക്യൂട്ടിക്കുറയുടെ മണം  പരത്തി
 മാറുന്ന പടത്തിന്റെ  ആദ്യ ഷോവിനെത്തും  സരസു
വറീതിന്റെ ചുണ്ടിൽ ബീഡിയില്ലാത്ത രണ്ടു മണിക്കൂർ
നസീറിന് ഇടി കൊണ്ടാൽ കരയുന്ന കൊച്ചമ്മു
ജയഭാരതിയുടെ വീണക്കുടം പോലൊന്ന്
രാജപ്പന്റെ സ്വാപ്നങ്ങളിൽ പോലുമില്ലായിരുന്നു
അച്ചാണിയും അയോധ്യയും കറങ്ങി തീരുമ്പോൾ
മൂക്കു പിഴിയലും ഏങ്ങലടിയും
*
പളനിയെക്കാൾ ചെമ്പന്കുഞ്ഞിനെ ഓർക്കുന്നവർ
തനിയാവർത്തനം കണ്ടു കണ്ണ് നിറഞ്ഞു
പടയോട്ടം  കണ്ടു കൺ മിഴിച്ചു
ഗ്യാപ് പടത്തിന് ബിറ്റും മടിയിൽ തിരുകി വരും
 സാമി വൈകിയാൽ പരക്കം പായും  ദാസേട്ടൻ
*
കാലിന്നിടയിൽ കയ്യും തിരുകി കിടന്ന്
വെള്ളത്തുണിയിൽ നിന്നാവഹിച്ചിറക്കുന്ന
അനുരാധയും സിൽക്കും  പ്രമീളയും
ശ്രീകൃഷ്ണയിലിരുന്ന്  വിരലൊന്നമർത്തിയാൽ
ഇപ്പോഴും അവർ ഇറങ്ങി വരും
*
കുമാരൻ കിരീടം  മുപ്പത് തവണ കണ്ടു
ഓരോ ഷോവിനും തിലകൻ
'മോനെ കത്തി താഴെ ഇടെടാ'
എന്ന് പറയുമ്പോൾ അയാൾ
കണ്ണ് തുടച് ഇറങ്ങിപ്പോകും
ആയാളും മകൻ  ഷാജിയോട് ഇത് പറഞ്ഞിട്ടുണ്ട്
പക്ഷെ  അവനും കത്തി താഴെയിട്ടില്ല
അയാളുടെ കൈ ഇടത്തെ നെഞ്ചിലെ
മുറിപ്പാടിൽ  അറിയാതെ പരതും



Thursday, July 28, 2016

അസംബന്ധ കവിതകൾ : 13

എനിക്ക് ഭ്രാന്താണെന്ന് അവർ
അവർക്കെല്ലാം  ഭ്രാന്തുണ്ടാവണമെന്നില്ല
ഭ്രാന്തില്ലാത്ത ഒരാൾ അവരിലും കാണില്ലേ
*********

ഞാൻ  എന്നോട് തർക്കിക്കുമ്പോഴാണ്
നിങ്ങൾ എന്നെ കേൾക്കുന്നത്
ഞാൻ മൂകനാകുമ്പോഴാണ്
നമ്മൾ തർക്കിക്കുന്നത്
********

മക്കളെ പഠിപ്പിക്കാൻ
മിടുക്കരാണ് നാം
അവരെ പഠിക്കാൻ
മണ്ടന്മാരും




Thursday, July 21, 2016

നഗ്നൻ


 ഒരു നട്ടപ്രാന്തൻ അലറിപ്പായുന്നുണ്ട്
കുട്ടിക്കാലത്തിന്റെ ഓർമ്മഞരമ്പിൽ
അവനെ  പേടിച്ച്‌
ഞാനെത്ര മാമുണ്ടു
എത്ര നേരത്തെ ചായുറങ്ങി
എന്റെ പേരിൽ ഒരുരുള പോലും അവൻ തിന്നില്ല
ഒരു പോള  കണ്ണടച്ചുമില്ല

നട്ടുച്ചയെ പച്ചത്തെറിയാൽ ഞെരുക്കി
പാതിരാവിനെ നിലവിളിയായി കീറി മുറിച്ചു
വഴിയും പുഴയും  ആളും
മലയും  കാടും വയലും
അവൻ രണ്ടായി പകുത്തു

അവൻ നഗ്‌നനായിരുന്നു
കാടുപിടിച്ചു മുഷിഞ്ഞത്
ഒരു നാൾ  അവനെ  കാണാതായി
പിന്നെ പിന്നെ എന്റെ ഭ്രാന്തും മാറി

ഞാനും കുളിച്ചു കുട്ടപ്പനായി
പഠിച്ച്‌
വളർന്ന്
ജോലികിട്ടി
പെണ്ണുകെട്ടി
മക്കളെയുണ്ടാക്കി
വീടുവെച്ച്‌
കാറ് വാങ്ങി

ഒരു നട്ടപ്രാന്തൻ അലറിപ്പായുന്നുണ്ട്
കുട്ടിക്കാലത്തിന്റെ ഓർമ്മഞരമ്പിൽ




Thursday, July 14, 2016

അസംബന്ധ കവിതകൾ :12



മരണം
എനിക്ക് നിന്നെ ഇഷ്ടമില്ല
വെറുപ്പുമില്ല
പേടിയില്ല
ആദരവുമില്ല
ആകാംഷയില്ല
വിധേയത്വമില്ല
എനിക്കു നിന്നോടുള്ളതെല്ലാം
ഇല്ലായ്മകളാണ്
***********

എല്ലാ ജീവചരിത്രവും
ഒന്നു തന്നെയാണ്
നിങ്ങൾ നിങ്ങളായ്
ജീവിച്ച ആദ്യത്തെ
പത്തു വർഷമൊഴികെ
അതാവട്ടെ
നിങ്ങൾ മറന്നും പോയി .
**********

വെറുതെ ജീവിക്കുന്നത്
എന്ത്  സുഖമാണ്
വെറുതെ നടക്കുന്നത്
വെറുതെ പാടുന്നത്
വെറുതെ ചിരിക്കുന്നത്
വെറുതെ കരയുന്നത്
വെറുതെ
വെറുതെ
വെറുതെ മരിക്കുന്നത് 

Sunday, July 10, 2016

അസംബന്ധ കവിതകൾ - 11

എല്ലാം ശരിയാണ്
ശരിയൊഴികെ .
*******

അകത്ത് അഗാധമായ ഇരുട്ട്
പുറത്ത് നിറഞ്ഞ വെളിച്ചം
ഞാനീ വാതിൽപ്പടിയിലിരിക്കാം
*******
എന്നോട് മിണ്ടരുതെന്നു പറയുന്നു
അതു തന്നെയാണ് മരണവും
എനിക്കു ഇഷ്ടമില്ലാത്തത് ,
പേടിയില്ലാത്തതും
******

Monday, July 4, 2016

അസംബന്ധ കവിതകൾ - 10

പിന്നെ ഞാനെന്നെ പിന്തുടരാൻ തുടങ്ങി
ഒരു വിഡ്ഢിയെ അനുഗമിക്കുന്നത്
വിഡ്ഢിത്തമാണെന്നു തോന്നി
ഞാൻ മുന്നിൽ കയറി  നടന്നു
ഒരു മണ്ടനെ നയിക്കുന്നത്
അതിലേറെ മണ്ടത്തരമാണെന്നു തോന്നുന്നു
***********

പൊള്ളുന്ന ഉടലിൽ
തീ പരതുമ്പോഴാണ്
മരവിച്ച ഹൃദയം
ചുണ്ടിൽ  തടഞ്ഞത്
**********


ജീവിതത്തിലെ
 വിലയേറിയ നിമിഷം
അങ്ങനെയൊന്ന്
ഇല്ലെന്നറിയുന്ന നിമിഷമാണ്
( ചിലപ്പോൾ അത്
മരണത്തിന്റെ നിമിഷമായേക്കാം )
***************

ശരിയോ   തെറ്റോ എന്ന
സന്ദേഹം കൂടുന്നുണ്ടെങ്കിൽ
നിങ്ങൾ അന്വേഷിക്കുന്നത് സത്യമാണ്
***************

മൃഗങ്ങളെപ്പോലെ
മരിക്കാൻ കഴിയുമെങ്കിൽ
നമ്മൾ മനുഷ്യരായാണ് ജീവിച്ചത്






Thursday, June 23, 2016

അസംബന്ധ കവിതകൾ -9

ഓരോ ചുവടിലും
ഞാൻ നില്ക്കുന്നുണ്ട്
ഓരോ നില്പ്പിലും
ഞാൻ നടക്കുന്നുണ്ട്
**************
ഭ്രാന്തനാവുക
എന്നത് ദുരന്തമാണ്
 ഭ്രാന്ത്‌ ഉണ്ടായിരിക്കുക
 എന്നത് ഭാഗ്യവും
**************
അന്യനിലേക്കുള്ള
ദൂരം കൂടുന്തോറും
എന്നിലേക്കുള്ള
അകലം കുറയുന്നു
***************

Monday, June 20, 2016

അസംബന്ധ കവിതകൾ -8


വേദനയെ എത്ര സ്നേഹിക്കുന്നു
എന്നറിയാൻ
നിങ്ങൾ പങ്കുവെക്കുന്ന
സന്തോഷം നോക്കിയാൽ മതി
**************
ഇടയ്ക്കിടെ പറിച്ചു നോക്കുന്ന
ചെടിയാണ് ജീവിതം
വേര് പിടിക്കുന്നില്ല
ഉണങ്ങി പോകുന്നുമില്ല
*************
താഴേക്കു നോക്കുമ്പോൾ
ഞാനെത്ര ഉയരത്തിലാണ്
മേലോട്ട് നോക്കുമ്പോൾ
എത്രയോ ആഴത്തിലും

Friday, June 17, 2016

ദളിതം

എന്നെ കെട്ടിപ്പിടിക്കുമ്പോഴും
നമുക്കിടയിലെഅകലമെനിക്കറിയാം
തോളിൽ കയ്യിട്ടു പോസ് ചെയ്യുമ്പോൾ
എന്നിൽ നുരയുന്ന പുച്ഛം ഞാൻ മാത്രമറിയും
(നിന്നിലും )

എന്റെ അവകാശങ്ങൾ ചോദിക്കുന്നത്
നീ നിന്റെ അവകാശമാക്കി
വൈകികിട്ടുന്ന നീതിയുടെ തുട്ടുകൾ
നിന്റെ ഔദാര്യം പോലെ വലിച്ചെറിയരുത്

എന്റെ അവസ്ഥ എന്നോളമറിയുന്നത്
ഞാൻ മാത്രമാകെ
നിന്റെ സിദ്ധാന്തങ്ങൾ അതിൽ കെട്ടിവെക്കരുത്

എത്ര ചായം തേച്ചാലും നമ്മുടെ നിറങ്ങളിൽ
ആഴ്ന്നു പോയൊരു ചരിത്രമുണ്ട്
നിന്റെ നോട്ടം എപ്പോഴും മുകളിൽ നിന്നാണ്
നിന്റെ കൈകളും മുകളിൽ തന്നെ


Tuesday, June 14, 2016

അസംബന്ധ കവിതകൾ -7

പ്രണയം
__________
എന്നെയാണെനിക്ക്ഏറെ ഇഷ്ടം
അതാണ്‌ എന്നോടിഷ്ടമുള്ള
നിന്നെ എനിക്കിത്ര ഇഷ്ടം
***********
സ്വപ്‌നങ്ങൾ പങ്ക് വെക്കാം
പ്രിയമുള്ളവരോട്
യാഥാർത്ഥ്യം പങ്കിടാൻ
ഒരു സുഹൃത്ത് വേണം
*************
മഴക്കവിതകളെ കുറിച്ചൊരു
സെമിനാർ ആയിരുന്നു
നശിച്ച മഴ മൂലം
ഞങ്ങൾ അത്  ദുബായിലേക്ക് മാറ്റി

Monday, June 6, 2016




Image result for iraq invading kuwait

unlimited stupidity
 _____________

നമ്മുടെ ബുദ്ധിജീവി സമൂഹം  മലയാളികളെ ,കേരളത്തിന്റെ ചിന്തകളെയും സര്ഗാത്മക സൃഷ്ടികളേയും വിലയിരുത്തുമ്പോൾ പൊതുവെ പറയുന്ന ഒരു പോരായ്മ ഉണ്ട് .നമ്മൾ ഒരു യുദ്ധം അനുഭവിച്ചിട്ടില്ല .ഒരു യുദ്ധത്തിന്റെ ഭീകരതയിലൂടെയും കടന്നു പോയിട്ടില്ല .ആ അനുഭവത്തിന്റെ കുറവ് നമ്മുടെ സൃഷ്ടികളിൽ തെളിയുന്നുണ്ട് .
ശരിയാണ് ,നമ്മൾ ഒരു യുദ്ധത്തിലും നേരിട്ട് പങ്കെടു ത്തിട്ടില്ല .ഇന്ത്യ പങ്കാളിയായ യുദ്ധങ്ങളും നമ്മെ ഒരു യുദ്ധാനുഭാവത്തിലേക്ക് തള്ളിവിട്ടിട്ടില്ല .
പക്ഷെ ഈ കഴിഞ്ഞ നൂറ്റാണ്ടിന്റെ ആന്ത്യത്തിൽ നമുക്ക് ,മലയാളികളിൽ ഒരു നല്ല പങ്കു ജനങ്ങള്ക്കും ഒരു ഭീകരമായ യുദ്ധാനുഭവത്തിലൂടെ  കടന്നു പോവേണ്ടി വന്നു .
1990 ൽ ഇറാക്കിന്റെ കുവൈറ്റ് അധിനിവേശം .അന്ന് അവിടെയുണ്ടായിരുന്ന രണ്ടു ലക്ഷത്തിൽ താഴെയുള്ള ഇന്ത്യക്കാരിൽ ഭൂരിപക്ഷവും മലയാളികൾ ആയിരുന്നു .ജന്മദേശത്തുനിന്നും ഇത്രയും അകലെ ഒരു യുദ്ധത്തിന്റെ നടുവിൽ  അകപ്പെടുക .അഭയത്തിനു ആരുമില്ല .(കുവൈറ്റ്‌ ഭരണാധികാരികൾ മണിക്കൂറുകൾ ക്കകം അവിടെ നിന്നും രക്ഷപ്പെട്ടിരുന്നു ) .ഏറെ യാതനകൾക്കൊടുവിൽ അവർ അവിടെയുള്ളതെല്ലാം ഉപേക്ഷിച്ചു പാലായനം ചെയ്തു .ജോർദാൻ വഴിയും മറ്റും നാട്ടിലെത്തി .
അന്ന് ഇറാക്കിന്റെ ഭരണാധികാരി സദ്ദാം ഹുസൈൻ ആയിരുന്നു .കുവൈറ്റ്‌ പിടിക്കുക മാത്രമല്ല അവിടുത്തെ എണ്ണ കിണറുൾക്ക് തീവെച്ച് പരിസ്ഥിതി നാശവും ലക്ഷക്കണക്കിന്‌ ബാരൽ ഇന്ധനവും നഷ്ടപ്പെടുത്തുകയും ചെയ്തു .
 അമേരിക്കയും സഖ്യ കക്ഷികളും ചേർന്ന് ഇറാഖിനെ ആക്രമിക്കുകയും സദ്ദാം കൊല്ലപ്പെടുകയും ചെയ്തു .പിന്നീട് ഇറാൻ സാമ്പത്തികമായ് തകരുകയും അഭ്യന്തര കലഹങ്ങൾ ഉണ്ടാവുകയും മതമൗലിക വാദികൾ  പിടി മുറുക്കുകയും ചെയ്തു ഇതിൽ അമേരിക്കയുടെ താല്പര്യം എന്തുമാകട്ടെ ,സദ്ദാം കൊല്ലപ്പെട്ടപ്പോൾ ലോകത്ത് ഹർത്താൽ നടത്തി പ്രധിക്ഷേധിച്ച ഒരേയൊരു സ്ഥലം കേരളമായിരുന്നു.
അതും ഇടതുപക്ഷ സംഘടനകളുടെ നേതൃത്വത്തിൽ .(കുവൈറ്റ്‌ യുദ്ധത്തിനു മുന്പുതന്നെ ഇറാക്കിലെ കമമ്യുണിസ്റ്റുകളെ സദ്ദാം ഉന്മൂലനം ചെയ്തിരുന്നു .)
പലപ്പോഴും നമ്മുടെ ഇടതുപക്ഷ നിലപാടുകൾ അശ്ലിലമായ ഫലിതം മാത്രമല്ല ,പരിധികളില്ലാത്ത അസംബന്ധവും കൂടിയാണ് .

Thursday, June 2, 2016

തീർത്താലും തീരാതെ

തീർത്താലും  തീരാതെ
എത്ര പങ്കുവെച്ചാലും ചിലത് ബാക്കിയാവും
പറയാതെ പോയ വാക്കുകൾ
ആഴങ്ങളിൽ അടിഞ്ഞു പോയ
ആരുമറിയാത്ത നൊമ്പരങ്ങൾ
ഏകാന്തതയിൽ ഹൃദയത്തെ തൊട്ടുരുമ്മുന്നത്‌
സന്തോഷത്തിന്റെ നിറനിമിഷങ്ങളിലും മൌനിയാക്കുന്നത്
ആൾക്കുട്ടത്തിന്റെ നടുവിലും തനിച്ചാക്കുന്നത്
ഏകാന്ത രാവുകളിൽ ഒരു പാട്ടിൽ അലിയുമ്പോൾ
തണുത്ത വിരൽ സ്പര്ശം പോലെ
തനിയെയുള്ള ഒരു ദൂരയാത്രയിൽ
 അനന്തമായ വിജനതയിൽ നിന്ന്
ഒരു കുളിർ കാറ്റ്  വന്ന്  പൊതിയും പോലെ
ഇരുളിൽ തനിച്ചിരിക്കുമ്പോൾ
പിൻകഴുത്തിൽ ഒരു നിശ്വാസം പോലെ
നുകർന്ന നിർവ്രുതികളെക്കാൾ
അകാരണമായ ഈ നോവെത്ര ഹൃദ്യം
ഏറെ പ്രിയങ്കരം





Friday, May 27, 2016

അസംബന്ധ കവിതകൾ -6

ഏകാന്തതയോളം വരില്ല
ഭൂമിയുടെ ഭാരം .

*********

മൗനംകൊണ്ട് മുറിവേറ്റവൻറെ
നോവാണ്  കവിത

*********

വെറുതെയാണെല്ലാം
വെറുതെയെന്ന വാക്കുപോലും

*********

Wednesday, March 30, 2016

അസംബന്ധ കവിതകൾ :5

ഇനിയെനിക്ക് സ്വസ്ഥനായ് നടക്കാനാവും
എന്റെ വഴികളെല്ലാം അവസാനിച്ചു .
********

ഇല്ലായ്മയുടെ അവസാനത്തെ പടിയിലാണ്
അഭിമാനം തളം കെട്ടികിടക്കുന്നത് .
********

മരങ്ങൾക്കിടയിലാണ്
കാട് ഒളിച്ചിരിക്കുന്നത് .
*********

Thursday, February 4, 2016

അസംബന്ധ കവിതകൾ-4


ചുംബിച്ചതിന്
ചുണ്ടുകളെ
ലോക്കപ്പിലിട്ടത്‌
ഒരേ മുറിയിൽ
*******
എൻറെ ജഡത്തിനരികിൽ
 ഞാനൊന്ന് കണ്ണ്   തുറക്കാൻ
പ്രാർത്ഥിക്കുന്നു നീ
 ഞാൻ കണ്ണ് തുറന്നാലോ
നീ തിരിഞ്ഞ് നോക്കാതെ
ഓടുന്നത് കാണേണ്ടി വരും
**************

മലയാളിയുടെ സ്വന്തം
മത്സര ഇനങ്ങളാണ്
വീട് വെക്കലും
വിവാഹവും
************




Thursday, January 21, 2016

അസംബന്ധ കവിതകൾ :3




ബുദ്ധനെ കല്ലെറിയൂ
അത് പൂക്കളായ് തിരിച്ചുവരും
*********
മരങ്ങൾക്ക് ഭാരം  കിളികൾ മാത്രം
പുല്ല് താങ്ങുന്നത്‌ ആനയെ
*********
ഇടവഴിയിലെ
ഭീകരമൂർഖൻ
തല്ലികൊന്നപ്പോൾ
ചേരയായി
*********

Saturday, January 9, 2016

അസംബന്ധ കവിതകൾ -2



പുഴയിൽ നീന്തുന്ന മീൻ
പുഴ കാണുന്നില്ല
പുഴ കാണുന്ന ഞാൻ
പുഴയെ അറിയുന്നുമില്ല
*******
പുഴ ഒഴുകുന്നു
പുഴയിൽ മുഖം നോക്കി ആകാശവും
അവളൊന്നു ചിരിച്ചാൽ
അവനതിൽ അലിഞ്ഞു പോകും
*******

Sunday, January 3, 2016

അസംബന്ധ കവിതകൾ -1


എല്ലായിടവും
മഞ്ഞു പെയ്യുന്നുണ്ട്
ഓർത്തുവെക്കുന്നത്
ഇലകൾ മാത്രം
***********
മഞ്ഞും മരവും
രാവിൽ ചെയ്തതിന്റെ
ചെറു പുഞ്ചിരിയാണ്
ഇലത്തുമ്പിലെ ജലബിന്ദു .
***********
ആഴങ്ങൾ താണ്ടുന്നു വേരുകൾ
ആകാശം തേടുന്നു ചില്ലകൾ
രണ്ടറ്റത്തേക്ക് പാഞ്ഞിട്ടും
മരങ്ങൾക്ക് ചലനമില്ലത്രേ
**********