പാതി

അവൻ വിധേയനായിരുന്നു
അവൾ അന്വേഷിയും
ദൈവം മറച്ചുവെച്ച മനോഹര ഭൂമി
നമുക്കായ് കണ്ടെടുത്തവൾ .
ആദ്യ വിപ്ലവത്തിന്റെ നായിക
ചോദിക്കാൻ പഠിപ്പിച്ചവൾ  .


ഭൂമിയിൽ വിമോചനത്തിന്റെ
വെളിച്ചം പകര്ന്നവൾ
അമ്മയായും പ്രണയിനിയായും
ഭാര്യയായും മകളായും
ഇവിടെ വസന്തം നിറച്ചവൾ
അവളുടെ പാതിയാണവൻ

പ്രാർഥിച്ചു തളരുമ്പോൾ
ഒരു നിമിഷം അവളെയോർക്കുക
ഒരു കനി അവൾക്ക് നൽകുക
ഒരു ദംശനത്താൽ മധുരം നിറച്ച്
അവൾ നിനക്കത് തിരിച്ചു നൽകും -
പുതിയ ഭൂമികൾ വീണ്ടെടുക്കാൻ

നന്ദിയോടൊരു വാക്ക് സാത്താനും .

?

 ചോദ്യങ്ങൾക്ക് പിന്നിൽ
ഒരു വളഞ്ഞ കൊളുത്തുണ്ട്,
ചില ഉത്തരങ്ങളിൽ കൊളുത്തി വലിക്കാൻ .

തെറ്റായ ചോദ്യങ്ങൾക്കാണ്
 നാം ശരിയായ ഉത്തരം തേടുന്നത്
ഉത്തരം കിട്ടാത്ത ചോദ്യങ്ങൾക്ക് മേൽ
ഉത്തരം പോലൊന്ന് കമഴ്ത്തിവെക്കുന്നു
പിന്നെയും ചോദ്യം മുളയ്ക്കുന്നു .

ഉത്തരമില്ലാത്ത ചോദ്യങ്ങളല്ല
ഉത്തരം അധികരിച്ച ചോദ്യമാണ് ചരിത്രം
ചിലപ്പോൾ ചോദ്യങ്ങൾ വേട്ടപട്ടികളാണ്
മരണം മാത്രം മറുപടിയാവും .

വഴിയിലുപേക്ഷിച്ച ചോദ്യങ്ങളെ
കാലം വീണ്ടും ചികഞ്ഞെടുക്കും
ഉത്തരം തേടാനല്ല
ഉത്തരമില്ലെന്നറിയാൻ

സ്വയം ചോദിക്കുമ്പോൾ മാത്രമറിയും
ചോദിക്കാതെ പോയ ചിലത്
പുകയുന്നുണ്ടുള്ളിലെന്ന്
പറയാതെ പോയ ഉത്തരങ്ങളും .

നുറുങ്ങുകൾ -19

വലുതാവുംതോറും
തീരെചെറുതാവുന്നവരാണ് നാം
****

കുട്ടികളോട് കൂടണം
ഉള്ളിലൊരു കുട്ടിയുണ്ടാവണം
കെട്ടിപ്പടുത്ത പുറന്തോട് പൊട്ടി
നഗ്നനായ് കണ്മിഴിക്കണം
****

ഛ)യാമുഖിയിൽ
കാണുന്നതെന്നെ മാത്രം
പാട്‌പെട്ടത്‌ മായ്ച്ചാലും
നിറയുന്നത്  ശുന്യത .
****
  

മ്യാവൂ

ഫ്ലാറ്റിന്റെ പോർച്ചിൽ നിന്ന്
ഫോണ്‍ ചെയ്യുകയായിരുന്നു
ഓരോവിളികളിലും
എന്നെ ബോധ്യപ്പെടുത്തികൊണ്ടിരുന്നു

പെട്ടന്നാണതെന്റെ
കാലിൽ തൊട്ടത്‌
ഞെട്ടി പുറകോട്ട് മാറി
വളരാൻ തുടങ്ങുന്ന പൂച്ചകുട്ടി
അതെന്റെ കണ്ണുകളിലേക്ക് നോക്കി
എന്താടോ .ഇതിന് മുമ്പ് പൂച്ചയെ കണ്ടിട്ടില്ലേ ?
ചമ്മൽ മാറ്റാൻ ഫോണിലൊളിച്ചു

എന്റെപാദങ്ങളിൽ മൃദുവായൊരു സ്പർശം
അതിന്റെ കുഞ്ഞുടൽ കാലിലുരസുന്നു
ഇത്രമേൽ ഹൃദ്യമായത് ഇതിനു മുന്പുണ്ടോ ?
(മറ്റൊരാൾ എന്നെ തൊട്ടിട്ട് എത്ര നാളായിരിക്കും ?)

അവളെന്റെ പാദങ്ങൾ തൊട്ടുരുമ്മി
കാലുകൾക്കിടയിൽ കയറിയിറങ്ങി
ഞാൻ കാലുകൾ കുറച്ചുകൂടെ  ചേർത്തുവെച്ചു

അവളെന്നോട് പറയുന്നുണ്ടായിരുന്നു
സ്നേഹിക്കുന്നവരെ മാത്രമല്ല
സ്നേഹിക്കാൻ മറന്നവരെയും
ഇടയ്ക്ക് ഓര്ക്കണം .

നിഴൽ

മരുഭൂമിയുടെ അടരുകൾക്കടിയിൽ

മരിച്ചുപോയൊരു പുഴയുണ്ട്

മണൽകാറ്റിന്റെ നെറുകയിലൊരു

മഴമേഘത്തിന്റെ നിഴലുണ്ട്

വെയിൽ തിന്നുന്ന മരത്തിന്റെ

വേരുകൾ മരിച്ചവരെ തൊടുന്നുണ്ട് .



എകാന്തതക്കും

ഒറ്റപ്പെടലിനുമിടയിൽ
.
മരുസാഗര ദൂരം

പല്ലിൽ കുരുങ്ങിയ ഇരയുടെ പിടച്ചിൽ

 

വ്യാകരണം

അർത്ഥങ്ങൾ അറിയും മുമ്പേ
വാക്കുകൾ തന്നെ ഇല്ലാതാവും
അറിയാനായ്  അലയുമ്പോൾ
അലയുന്നതിന്റെ അർത്ഥമറിയും
അർത്ഥം പലപ്പോഴും വ്യർത്ഥമെന്നറിയും
*
ദൈവത്തിന് നാനാർത്ഥങ്ങളില്ല
പര്യായങ്ങളേയുള്ളൂ .
പരമാർത്ഥം തെരയുമ്പോൾ
പുരുഷാർത്ഥമറിയും
അന്വേഷിയും ദൈവവും
ഒരേവാക്കിന്റെ അർത്ഥമാകും
*
അമ്മയുടെ വിപരീതം അച്ഛനെന്ന്
അന്നെത്ര പഠിച്ചിട്ടും അറിയാനായില്ല
വളർന്നച്ചനായപ്പോൾ
എല്ലാ വാക്കിനും വിപരീതമുണ്ടെന്നറിഞ്ഞു
അച്ഛനും അമ്മയ്ക്കും മക്കൾക്കും .

വിപരീതങ്ങളുടെ അർത്ഥമറിയാൻ
ജീവിതം പോരാതെയാവും .

നുറുങ്ങുകൾ 18

 .പാടിപ്പുകഴ്ത്തിയ
സ്വാർത്ഥതയാണ് രണ്ടും ,
പ്രണയവും പ്രാർത്ഥനയും .
**
പ്രണയിക്കാനൊരാളും
പ്രാർഥിക്കാനൊരു ദൈവവും
വിശ്വാസമാണെല്ലാം
 **
കണ്ണിന് എല്ലാം കാണാം
കണ്ണിലെ കരട് കാണാൻ
മറ്റൊരു കണ്ണുവേണം
**.
ചോരയാണ് ചരിത്രം
ആയുധം വാക്കുകളും
അന്നും ഇന്നും .
**
ചിലർ ആടിത്തിമിർക്കുന്നു
ചിലർ ആടിത്തീർക്കുന്നു

 

ഭൂമിക

ഭൂമിക

______

മരമായ്‌ വളരണം

വിണ്ണിലേക്ക് -

മണ്ണിലേക്കും .

*

ചില്ലയുണങ്ങിയ

ചില മരങ്ങളെങ്കിലും

വേരുകളിൽ പൂക്കുന്നുണ്ട് .

മറ്റാരുമറിയാതെ .

*

പൂവിൻറെ നെഞ്ചുകീറിയാണിപ്പോൾ

കാറ്റ് പൂമണം നുകരുന്നത്

കാറ്റിന്റെ വാളൊച്ച കേട്ടാണിപ്പോൾ

മൊട്ടുകൾ വിരിയുന്നത്

*

പൊഴിയുന്ന ഇലകൾ

മണ്ണായ് തീരുമ്പോൾ

വേരുകൾ തൊടുന്നുണ്ടാവും

*

മഴുവുമായ് നീയെത്തുമ്പോൾ

കിളികളെല്ലാം പറന്നുപോകും

കരയാനറിയാതെ പാവം

കണ്ണടച്ച് പിടിക്കുന്നുണ്ടാവും

ബോണ്‍സായ്

ഇത്തിരി ചട്ടിയിൽ
ഇത്തിരി മണ്ണിലൊടുങ്ങും ജന്മം
ആരോ അദൃശ്ശ്യമാം കമ്പിയിൽ
വളച്ചെടുത്തൊരാകാരം .
ഇടയ്ക്കിടെ പറിച്ചെടുത്ത-
രിഞ്ഞു മാറ്റുന്നു വേരുകൾ .

ഒരു കിളിക്കും ചേക്കേറാനവില്ല
ഒരു പുഴുവിനും തണലാവില്ല
ആർക്കുമൊരു കനിപോലും നൽകാനില്ല

വെയില് കൊള്ളേണ്ട
മഴനനയേണ്ട
ജനലിനിപ്പുറം ഇത്തിരി ലോകം

ആരും മഴുവുമായ് വരില്ല
സുഖം സ്വസ്ഥo ജീവിതം
നമ്മൾ ബോണ്‍സായികൾ .

 

നുറുങ്ങുകൾ -17

ഒറ്റവാക്കിൻറെ നിഘണ്ടുവാണ്
പുതിയ കാലം -'achieve'
*********

വെയില് കൊള്ളുന്ന മരങ്ങളേ
തണലേകാറുള്ളൂ
*********

ആഴങ്ങളിലാണെല്ലാം
ചെളിയും ചിപ്പിയും
*********

എൻറെ  ശരികൾ
നിൻറെയും ശരികളാവുമ്പോഴേ
ശരിക്കും ശരിയാവു .
********