ഓണാഘോഷം

ഇന്ന്
ഓണം
ഹാപ്പി ഓണം
ഓണാശംസകൾ
സെയിം ടു  യു
താങ്ക് യു
പത്തു മണി
അത് കഴിഞ്ഞു
പിന്നെ
ഉച്ചക്ക് ഓണസദ്യ
തട്ടിവിട്ടു
ചവച്ചു തുപ്പിയ
ഓണ സ്മൃതികളും
ടീവി കണ്ടു
ശർദ്ദിക്കാൻ വരുന്നു
ഇനി ഒന്നുറങ്ങണം
രാത്രി ഡ്യൂട്ടിയുണ്ട് 

നുറുങ്ങുകൾ 27

ജീവിതം
മരണം
രണ്ടും അവസാനിക്കുന്നത്
പൂജ്യത്തിലാണ്
രണ്ടിനും പൊതുവായുള്ളതും
പൂജ്യം മാത്രം .
***********
പച്ചയായ ജീവിതമെന്ന്
പറയുന്നതെപ്പോഴും
തീരെ പച്ചയില്ലാത്ത
ജീവിതങ്ങളെയാണ്
***********

നുറുങ്ങുകൾ -26

ഇന്നലെകളെ മായ്ക്കാനാവില്ല
ഇന്നിനെ മാറ്റാനാവില്ല
നാളയെ അറിയാനുമാവില്ല
എങ്കിലും ജീവിതം
സ്വന്തമാണ് ,സ്വതന്ത്രവും

മേരി

____

മറിയം,

എന്‍റെ ദൈവത്തിന്

നിന്റെ മുഖമാണ്

കരുണയിലും വേദനയിലും നനുത്തത്

*****

പിതാവും

പുത്രനും

പരിശുദ്ധാത്മാവും

നീയെവിടെ?

*****

കുരിശില്‍ നിന്നിറക്കിയത്

നിന്‍റെ കൈകളിലേക്കാണ്

ഇത്രയും സ്നേഹാര്‍ദ്രമായ സമ്മാനം

സ്വന്തമായില്ല ആര്‍ക്കും ഇതുവരെ

*****

വിശുദ്ധമായ രഹസ്യമാണ് നീ

നിന്‍റെ നിഗൂഡതയുടെ മേലാണ്

ഞങ്ങളുടെ ഭാവനകളത്രയും

*****

പേന 
എന്റെ കഴുത്തിന് പിടിച്ചാണ്
നിന്റെ ആത്മപ്റകാശനം

ചായ 
പേര്  ഒന്നാണെങ്കിലും
ഒനന്  പോലെ മറ്റൊന്നില്ല

മേശ 
നാല്‌ കാലുണ്ടെങ്കിലും
ഇനിയും ഓടാൻ പഠിച്ചില്ല

 ബ്ലോഗില്‍ ഞാന്‍ എഴുതുന്ന കവിതകളില്‍ നിന്നുംതെരഞ്ഞെടുത്ത് നീര്‍മാതളം ബുക്സ് 'മറ്റൊരാള്‍'

എന്ന പേരില്‍ ഒരു സമാഹാരം പ്രസിദ്ധീകരിക്കുന്നു.
വയനാട് ജില്ലാ ലൈബ്രറി പുസ്തകോത്സവത്തില്‍
കവി പി.കെ. ഗോപി പ്രകാശനം ചെയ്യുന്നു
വേദി: ലളിത് മഹല്‍ ഓഡറ്റോറിയം-കല്‍പ്പറ്റ
സമയം: മെയ്‌ 12 , 4.30 p.m
പുസ്തകം സ്വീകരിക്കുന്നത്; ശ്രീ അമ്മദ്
കവിത പരിചയപ്പെടുത്തുന്നത്: പി.കെ. സുധീര്‍.
എല്ലാ സ്നേഹിതരും പങ്കെടുക്കുക

facebook ലുംബ്ലോഗിലും എനിക്ക് പ്രചോദനം പകര്‍ന്ന എല്ലാ സഹയാത്രികര്‍ക്കും

സ്നേഹപൂര്‍വ്വം

Like · Comment · Share · 3066

നുറുങ്ങുകൾ 25

ഏകാന്തത-
പെരുമഴച്ചാർത്തിലും
സ്ഫടിക മഴവള്ളികൾക്കിടയിൽ
മഴ നനയാത്തൊരിടം

പ്രണയം -
സ്വരരാഗധാരയുടെ
യതിയിൽ പൂക്കുന്ന
ഒരു മാത്രതൻ മൗനം

സാന്ത്വനം -
നട്ടുച്ച നെറുകയിൽ
 നീറിപ്പടരുമ്പോൾ
അറിയാതെ വന്നെന്നെ
തലോടും നിൻ  വിരലുകൾ

 

മറവിയുടെ സ്മാരകമാണ് ചരിത്രം .

മറവിയുടെ സ്മാരകമാണ് ചരിത്രം .

ഓർമ്മകളെ നിരോധിക്കുന്ന നിയമം കൊണ്ടാണ്
കാലം കയ്യാമം വെക്കപ്പെടുന്നത്
ചരിത്രത്തിലില്ലാത്തവരുടെ ചോര ചിതറിയാണ്
അക്ഷരങ്ങൾ മാഞ്ഞു പോകുന്നത്
വരികൾക്കിടയിൽ പുകയുന്ന മൌനം
മരിച്ചവരുടെ കേൾക്കാതെ പോയ വിലാപമാണ്‌

വിശ്വാസം കൊണ്ട് പറക്കുന്ന വിമാനത്തിൽ
കലയുടെ കുതിരകൾ കടൽ  കടക്കുന്നു
വീട്ടിലേക്ക് തിരിച്ചു വരുന്നത്
പർദ്ധയിലൊളിപ്പിച്ചു വെച്ച
മൂക്കും മുലയും ചെത്തിയ നീതി മാത്രം

നിശ്ശബ്ദമാക്കപ്പെട്ട തെരുവുകളിൽ
 ശാസ്ത്രപുരോഹിതർ കണ്ണുകെട്ടി
 നാളെയുടെ  രഥം വലിക്കും
വാനരന്റെ വാലുകൊണ്ട്
ഇന്നലെകൾക്ക് ഛായം പൂശും

പിഴുതെടുത്ത നാവുകൾ കൊണ്ട്
പാരമ്പര്യത്തിന് ബലിയൂട്ടുമ്പോഴും
ചിലത് ബാക്കിയാവുന്നു-
നാളെയുടെ വസന്തം തീർക്കാൻ
മൃതി മറന്ന സ്മൃതിയുടെ വിത്തുകൾ


 

സ്മരണ

ഇന്ദിരാജിയെ സ്മരിക്കുമ്പോൾ
സിക്കുകാരെ ഓർക്കരുത്‌
രാജിവ്ജിയെ സ്തുതിക്കുവാൻ
പേരറിവാളനെ അറിയരുത്
പ്രഭാകരനെ കൊണ്ടാടുമ്പോൾ
സിംഹളരെ മാത്രമല്ല
തമിഴരെയും കാണരുത്
സദ്ദാമിൻറെ വീരഗാഥയിൽ
ഇറാക്കിനെ മറക്കണം

നമോ നമ: പാടുവാൻ
ഓർമ്മ മാത്രം പോര
ബോധവും ഇല്ലാതാവണം
മറവിയുടെ മലമുകളിലാണ്
വാഴ്ത്തപ്പെടുന്നവരുടെ
ആരുഡങ്ങളധികവും 

ഓർമ്മകുറിപ്പ്

ഓർമ്മകളുടെ

ഓർമ്മയാണ്‌ കവിത 

*****

ഓർമ്മയടെ 

പരിഭാഷയിൽ
വാക്കുകൾ
നിലവിളിക്കുന്നു
******
ഓർക്കുവാൻ ഏറേ
മരണങ്ങളുണ്ട്
മറക്കാൻ പഠിക്കുന്ന
ഓരോ ജീവിതത്തിലും
******
അവയവം
ദാനം ചെയ്യുംപോലെ
മരിക്കുമ്പോൾ
ഓർമ്മകൾ
ദാനം ചെയ്യാനാവുമോ ?
*******
 ആദ്യം പിരിയുന്നവരാണ്
ഓർമ്മകളിൽ
അവസാനമെത്തുക