സ്മരണ

ഇന്ദിരാജിയെ സ്മരിക്കുമ്പോൾ
സിക്കുകാരെ ഓർക്കരുത്‌
രാജിവ്ജിയെ സ്തുതിക്കുവാൻ
പേരറിവാളനെ അറിയരുത്
പ്രഭാകരനെ കൊണ്ടാടുമ്പോൾ
സിംഹളരെ മാത്രമല്ല
തമിഴരെയും കാണരുത്
സദ്ദാമിൻറെ വീരഗാഥയിൽ
ഇറാക്കിനെ മറക്കണം

നമോ നമ: പാടുവാൻ
ഓർമ്മ മാത്രം പോര
ബോധവും ഇല്ലാതാവണം
മറവിയുടെ മലമുകളിലാണ്
വാഴ്ത്തപ്പെടുന്നവരുടെ
ആരുഡങ്ങളധികവും 

ഓർമ്മകുറിപ്പ്

ഓർമ്മകളുടെ

ഓർമ്മയാണ്‌ കവിത 

*****

ഓർമ്മയടെ 

പരിഭാഷയിൽ
വാക്കുകൾ
നിലവിളിക്കുന്നു
******
ഓർക്കുവാൻ ഏറേ
മരണങ്ങളുണ്ട്
മറക്കാൻ പഠിക്കുന്ന
ഓരോ ജീവിതത്തിലും
******
അവയവം
ദാനം ചെയ്യുംപോലെ
മരിക്കുമ്പോൾ
ഓർമ്മകൾ
ദാനം ചെയ്യാനാവുമോ ?
*******
 ആദ്യം പിരിയുന്നവരാണ്
ഓർമ്മകളിൽ
അവസാനമെത്തുക
 

2015
happy birthday to you

നുറുങ്ങുകൾ - 24

നുറുങ്ങുകൾ - 24
-------------------------

മതം

തമം
തിരിഞ്ഞു പോയതാവാം
മതം.
******

ചോദ്യങ്ങൾ
ഉപേക്ഷിച്ചവരുടെ
തൊഴുത്താണ്
 വിശ്വാസം
*******

വിവാഹം

ഒരു സ്വപ്നം
സത്യമായി തീരുമ്പോൾ
അതിലേറെ സത്യങ്ങൾ

 സ്വപ്നമായ് മാറും
******
പ്രവാസം 

ഒടുവിൽ

ഓരോ പ്രവാസിയും
നാടുകടത്തപെടുന്നത്
നാട്ടിലേക്കാണ്

*******

വിളി

എന്തൊക്കെയുണ്ട് വിശേഷം ?-
പ്രിയ സുഹൃത്തേ
വല്ലപ്പോഴും വിളിക്കുമ്പോൾ
ചതഞ്ഞരഞ്ഞ ഈ ക്ലീഷേ
ഒഴിവാക്കുക
കണ്ണ് നഷ്ടപ്പെട്ടവനോട്
കാഴ്ച്ചകൾ വർണ്ണിക്കരുത് .
*
ചില വിളികൾ അങ്ങനെയാണ്
പ്രകൃതിയുടെ വിളി പോലെ
സമയമാകുമ്പോൾ സംഭവിച്ച് പോകും
ഒന്നിനുമല്ല
ഒന്നുമില്ല
ഇല്ലെങ്കിൽ
മുട്ടിയിട്ടും പോകാത്തത് പോലെ
*
പറയാനുള്ളത് കേൾക്കാറില്ല
കേൾക്കാനുള്ളത് പറയാറില്ല
എന്നിട്ടും
വിളിച്ചുകൊണ്ടിരിക്കുന്നു
കേട്ടുകൊണ്ടും
*
വിളികൾ നിലച്ചു
ചാറ്റും മടുത്തു
ഇനി
Whats up ?
 

ഓർക്കാൻ ഒത്തിരി നോവും
നനയാൻ ഇത്തിരി കനവും ,
നിന്നെ എഴുതാൻ
എനിക്ക് വാക്കെന്തിന് ?
******

 

നുറുങ്ങുകൾ 23

തീരെ ചെറി യവരാണ്
അകത്തെ വലിയ  പീഠങ്ങളിൽ
വലിയവർ
പുറത്തെ വെയിലത്തും .
**********
വിജയികളായി എണ്ണുന്നവർ
കൂടുതൽ പണം നേടിയവരാണെങ്കിൽ
ലോകം തോറ്റവരുടെതാണ് .
**********

ലോകം വിജയിച്ചവരെ തെരയുന്നു
എന്തായിരുന്നു മത്സരം ?
ഇവർ ആരെയാണ് തോൽപ്പിച്ചത്?
***********

ചിലരെ  ഒരു  നോക്കിലറിയാം
ചിലരെ  ചില  വാക്കിലും
ചിലരെയറിയാനൊരു
ജീവിതം  പോര
**********
 

തടവുകാർ

എന്റെ തൃഷ്ണകൾക്ക് മേൽ
അവർ പാപത്തിന്റെ മുദ്ര ചാർത്തി

എന്റെ ഇഛകളെ പ്രാക്താനമായൊരു
ഗോത്രബോധ യുക്തിയാൽ ആശ്ലിലമാക്കി

അരാജകന് നേരെ എയ്ത അമ്പ്‌
എൻറെ സ്വാതന്ത്ര്യത്തിന്റെ  നെഞ്ചിൽ തറഞ്ഞു

നിങ്ങളുടെ ശരികൾ വിശ്വാസത്തിന്റെ
പിന്തുടർച്ചകൾ  മാത്രം
എന്റേത് എന്റെ മാത്രം തോന്നലുകളും

എങ്കിലും

ഞാനും നിങ്ങളും 
നമ്മുടെ ശരിയുടെ തടവുകാർ
ലോകത്തിന്റെ  ന്യായാധിപരും

 

നിൽപ്പ്

നിലയില്ലാത്ത നിൽപ്പ്
നില തേടുന്ന നിൽപ്പ്
നിലനിൽപ്പിന്റെ നിൽപ്പ്
നിലപാടിന്റെ നിൽപ്പ്

നിൽക്കുന്നവന്റെ സഹനം
ഇരിക്കൻ തറ കിട്ടും  വരെ
കിടക്കാനിടം കിട്ടും വരെ

വയറുകത്തി നിൽക്കുമ്പോഴും
വീര്യം പൂത്തു നിൽക്കട്ടെ .

രാത്രി

അസ്ഥികൾ ചില്ലയായ് വേവുന്നു
 അപ്പം ചാരമായ് തിന്നുന്നു
തിരിച്ചെടുക്കും മുമ്പേ ഈപാനപാത്രം
 ഒരിക്കലെങ്കിലും നിറഞ്ഞിരുന്നെങ്കിൽ

 ഒലിവ് തോട്ടത്തിലെ ഇരുളിൽ 
രാവിൽ ഞാൻ വിലങ്ങണിയും
 വെളിച്ചം വെള്ള കീറും മുമ്പേ
 ഒരു വാക്കെങ്കിലും 
നീതി തേടുമോ 

ചുംബനത്താൽ 
ഒറ്റുകൊടുക്കപ്പെട്ടവനും
 ഒറ്റപ്പെടുകയും ചെയ്തവൻ 
ഞാൻ മാത്രമായതെന്തേ 

നീ കാരണം തേടി ഉഴറുമ്പോൾ
 ഞാൻ മരണം രുചിക്കും
 ഓർമ്മയുടെ മുള്ളുകൾ
 തീ പിടിച്ച പ്രജ്ഞയിൽ രക്തം നുണയും .

 കഷ്ടരാത്രിയിൽ ഞാൻ 
ഇരുളിന്റെ പൊരുളറിയുന്നു