നുറുങ്ങുകൾ- 11

മോഹം 

 

അണുനാശിനിയുടെ പരസ്യം പോലെയാണ്

മോഹങ്ങൾ

എത്ര തുടച്ചുമാറ്റിയാലും

ഒരു പാട് ബാക്കിയാവും .

***********

അടയാളം 
 

കുറിവരക്കുന്നതും

തൊപ്പിയിടുന്നതും

അന്ന് ഐശ്വര്യമായിരുന്നു

ഇന്ന് അടയാളവും .

*************

പ്രവാസം 
 

പ്രവാസമല്ല,

കുടിയേറ്റമാണെന്ന് ഭാഷാപണ്ഡിതൻ

കുടിയേറ്റമല്ല.

കുടിയിറങ്ങിയതാണെന്ന് പ്രവാസി

*************

പുലിപ്പുറത്തെ യാത്രയാണ് പ്രവാസം

കയറിയാൽ പിന്നെ

ഇറങ്ങാനാവില്ല .

**************

ത്യാഗം 
 

പ്രശ്നങ്ങളെല്ലാം ഉപേക്ഷിച്ച്

ആത്മീയ ശാന്തി തേടുന്നു സന്ന്യാസി

സ്വാസ്ഥ്യമെല്ലാം വെടിഞ്ഞ്‌

അപായമാം കർമ്മത്തിൻ അഗ്നിയേന്തുന്നു വിപ്ലവകാരി

എന്താണ്‌ ത്യാഗം ?

ആരാണ് പരിത്യാഗി ?

**************